ଇସ୍ପାତ ଜେନେରାଲ ହସପିଟାଲର ଡାକ୍ତରମାନେ ଦୁଇ ମାସରୁ ଅଧିକ ସମୟ ଧରି କୋମାରେ ରହିଥିବା ୫୨ ବର୍ଷୀୟ ରୋଗୀକୁ ସୁସ୍ଥ କଲେ

  ରାଉରକେଲା :   ଉନ୍ନତ ଚିକିତ୍ସା ସେବା ଏବଂ ବହୁବିଭାଗୀୟ ସମନ୍ୱୟର ଏକ ଉଲ୍ଲେଖନୀୟ ଉଦାହରଣ ସୃଷ୍ଟି କରି, ସେଲ୍‌, ରାଉରକେଲା ଇସ୍ପାତ କାରଖାନା (ଆର ଏସ ପି) ଅଧୀନସ୍ଥ ଇସ୍ପାତ ଜେନେରାଲ ହସପିଟାଲ (ଆଇ ଜି ଏଚ)ର ଡାକ୍ତରମାନେ ଗମ୍ଭୀର ମସ୍ତିଷ୍କ ଆଘାତ ପରେ ଦୁଇ ମାସରୁ ଅଧିକ ସମୟ ଧରି କୋମାରେ ରହିଥିବା ୫୨ ବର୍ଷୀୟ ଏକ ରୋଗୀକୁ ସଫଳତାର ସହ ସୁସ୍ଥ କରିଛନ୍ତି।

ଶ୍ରୀ ଗୋବିନ୍ଦ ଲାକ୍ରା ୨୦୨୬ ମସିହା ଏପ୍ରିଲ ୧୬ ତାରିଖରେ ଏକ ଦୁର୍ଘଟଣାରେ ମୁଣ୍ଡରେ ଗମ୍ଭୀର ଆଘାତ ପାଇଥିଲେ। ତାଙ୍କୁ ଗଭୀର କୋମା ଓ ଗମ୍ଭୀର ଶ୍ୱାସକଷ୍ଟ ଅବସ୍ଥା ସହିତ ଆଇ ଜି ଏଚ କୁ ଆଣାଯାଇଥିଲା। ଜରୁରୀକାଳୀନ ଭିତ୍ତିରେ କରାଯାଇଥିବା ମସ୍ତିଷ୍କର ଏମ ଆର ଆଇ ପରୀକ୍ଷାରେ ଶ୍ରୀ ଲାକ୍ରାଙ୍କ ଡାହାଣ ପଟ ଫ୍ରଣ୍ଟୋ-ଟେମ୍ପୋରାଲ ଅଞ୍ଚଳରେ ଏକ ହାଇପରଏକ୍ୟୁଟ ଏକ୍ସଟ୍ରାଡ୍ୟୁରାଲ ହେମରେଜ୍ (ଗମ୍ଭୀର ରକ୍ତସ୍ରାବ) ଚିହ୍ନଟ ହୋଇଥିଲା, ଯାହା ଏକ ବିପଦଜନକ ସ୍ଥିତି ହେବା ସହ ତୁରନ୍ତ ଅସ୍ତ୍ରୋପଚାର ଆବଶ୍ୟକ କରୁଥିଲା।

ରୋଗୀକୁ ଶୀଘ୍ର ଭେଣ୍ଟିଲେଟର ସହାୟତାରେ ରଖାଯାଇ, ନ୍ୟୁରୋସର୍ଜରୀ (ସିନିୟର କନସୁଲଟାଣ୍ଟ) ଡାକ୍ତର ମନୋଜ କୁମାର ଦେଓଙ୍କ ଦ୍ୱାରା ଏକ ଜରୁରୀକାଳୀନ ନ୍ୟୁରୋସର୍ଜରୀ (ମସ୍ତିଷ୍କ ଅସ୍ତ୍ରୋପଚାର) କରାଯାଇଥିଲା। ଏହି ଗମ୍ଭୀର ଅସ୍ତ୍ରୋପଚାର ସମୟରେ ଆନେସ୍ଥେସିଆ (ଅତିରିକ୍ତ ସିଏମଓ) ଡାକ୍ତର ସଞ୍ଜୁକ୍ତା ପାଣିଗ୍ରାହୀ, ଆନେସ୍ଥେସିଆ ସେବା ପ୍ରଦାନ କରିଥିଲେ, ଅନ୍ୟ ପକ୍ଷରେ ନର୍ସିଂ ଅଫିସର କମଳାକର ଅସ୍ତ୍ରୋପଚାର ସମୟରେ ସହାୟତା କରିଥିଲେ।

ସଫଳ ଅସ୍ତ୍ରୋପଚାର ପରେ, ରୋଗୀଙ୍କୁ ସୁଶ୍ରୀ ଶିନି ଜର୍ଜ ଓ ଆଇସିୟୁ ଟିମ୍‌ର ତଦାରଖରେ ଆଇସିୟୁରେ ତୀବ୍ର ଚିକିତ୍ସା ସେବା ପ୍ରଦାନ କରାଯାଇଥିଲା। ପରେ ତାଙ୍କୁ ଧୀରେ ଧୀରେ ଭେଣ୍ଟିଲେଟରରୁ ମୁକ୍ତ କରାଯାଇ, ଶ୍ୱାସ ପ୍ରଶ୍ୱାସରେ ସହାୟତା ପାଇଁ ଏକ ଅସ୍ଥାୟୀ ଟ୍ରାକିଓଷ୍ଟୋମି କରାଯାଇଥିଲା ଏବଂ ପରେ ଅନ୍ୟ ଚିକିତ୍ସା ପାଇଁ ୱାର୍ଡକୁ ସ୍ଥାନାନ୍ତର କରାଯାଇଥିଲା ।

ପ୍ରାୟ ଦୁଇ ମାସର ନିରବଚ୍ଛିନ୍ନ ଚିକିତ୍ସା ସେବା, ନର୍ସିଂ ସହାୟତା ଏବଂ ପୁନର୍ବାସ ପରେ, ରୋଗୀ ଧୀରେ ଧୀରେ ଚେତନା ଫେରି ପାଇଲେ ଏବଂ ସରଳ ନିର୍ଦ୍ଦେଶଗୁଡ଼ିକର ପ୍ରତ୍ୟୁତ୍ତର ଦେବା ଆରମ୍ଭ କଲେ। ସେ ମୁହଁରେ ଖାଦ୍ୟ ଗ୍ରହଣ ପୁନଃ ଆରମ୍ଭ କଲେ ଏବଂ ଟ୍ରାକିଓଷ୍ଟୋମି ଟ୍ୟୁବ ମଧ୍ୟ ସଫଳତାର ସହ କାଢ଼ି ଦିଆଗଲା।

ରୋଗୀଙ୍କ ସୁସ୍ଥତାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ୱାର୍ଡର ଏକ ନିଷ୍ଠାପର ନର୍ସିଂ ଟିମ୍, ଯେଉଁମାନଙ୍କ ମଧ୍ୟରେ ସିସ୍ଟର ଗୌରୀ, ସସ୍ମିତା, ରୀମା, ମନିଷା, ରୁବି, ସୋନିଆ ଏବଂ ଅନ୍ୟ କର୍ମଚାରୀ ଅନ୍ତର୍ଭୁକ୍ତ ଥିଲେ। ଶ୍ରୀ ପ୍ରେମାନନ୍ଦ ସ୍ୱାଇଁ ଓ ତାଙ୍କ ଟିମ୍ ଦ୍ୱାରା ପ୍ରଦାନ କରାଯାଇଥିବା ଫିଜିଓଥେରାପି ଏବଂ ପୁନର୍ବାସ ତାଙ୍କ ଗତିଶୀଳତା ଓ କାର୍ଯ୍ୟକ୍ଷମତାର ଉନ୍ନତିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ବର୍ତ୍ତମାନ, ଶ୍ରୀ ଲାକ୍ରା ସଚେତ ଅବସ୍ଥାରେ ଅଛନ୍ତି, ସରଳ ନିର୍ଦ୍ଦେଶ ପାଳନ କରିପାରୁଛନ୍ତି, ମୁହଁରେ ଖାଦ୍ୟ ଗ୍ରହଣ କରୁଛନ୍ତି ଏବଂ ସହାୟତା ସହିତ ଚାଲି ମଧ୍ୟ ପାରୁଛନ୍ତି।