ପ୍ରଧାନମନ୍ତ୍ରୀଙ୍କ ସହ ଭର୍ଚୁଆଲ୍ ସମ୍ବାଦରେ ସାମିଲ ହେଲେ ସମ୍ବଲପୁରର ଅଖିଳେନ୍ଦ୍ର ଶାସନୀ

‘ବିକଶିତ ଭାଇବ୍ରାଣ୍ଟ ଭିଲେଜ୍ ପ୍ରୋଗ୍ରାମ୍’ରେ ଓଡ଼ିଶାର ପ୍ରତିନିଧିତ୍ୱ; କଲେକ୍ଟରେଟ୍‌ରେ ଜିଲ୍ଲାପାଳଙ୍କ ଉପସ୍ଥିତିରେ ସମ୍ବର୍ଦ୍ଧିତ

କଦଳୀଗଡ଼  : ସମ୍ବଲପୁର ଜିଲ୍ଲା ପାଇଁ ଆଉ ଏକ ଗର୍ବର ମୁହୂର୍ତ୍ତ ସୃଷ୍ଟି ହୋଇଛି। ଭାରତ ସରକାରଙ୍କ ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରାଳୟ, ମାଇ ଭାରତ ଏବଂ ଇଣ୍ଡୋ-ତିବ୍ବତ ବର୍ଡର ପୋଲିସ୍ (ITBP) ଙ୍କ ମିଳିତ ସହଯୋଗରେ ଆୟୋଜିତ ‘ବିକଶିତ ଭାଇବ୍ରାଣ୍ଟ ଭିଲେଜ୍ ପ୍ରୋଗ୍ରାମ୍ (VVVP)’ ର ଅନ୍ତିମ ପର୍ଯ୍ୟାୟରେ ଦେଶର ୪୩୦ ଜଣ ଚୟନିତ ପ୍ରତିନିଧିଙ୍କ ସହ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭର୍ଚୁଆଲ୍ ମାଧ୍ୟମରେ ସିଧାସଳଖ ସମ୍ବାଦ କରିଥିଲେ। ଏହି ଗୌରବମୟ କାର୍ଯ୍ୟକ୍ରମରେ ଓଡ଼ିଶାର ପ୍ରତିନିଧି ଭାବେ ସମ୍ବଲପୁରର ତଥା ଅର୍ଜୁନ ଡିଗ୍ରୀ କଲେଜ, କଦଳୀଗଡ଼ର ଅଧ୍ୟକ୍ଷ ଅଖିଳେନ୍ଦ୍ର ଶାସନୀ ଅଂଶଗ୍ରହଣ କରିଥିଲେ।

ସମ୍ବଲପୁର କଲେକ୍ଟରେଟ୍‌ସ୍ଥିତ ଏନ୍‌ଆଇସି କେନ୍ଦ୍ରରେ ଏହି ଭର୍ଚୁଆଲ୍ ସମ୍ବାଦର ଆୟୋଜନ କରାଯାଇଥିଲା। ଏହି ଅବସରରେ ସମ୍ବଲପୁର ଜିଲ୍ଲାପାଳ ଶ୍ରୀ ସିଦ୍ଧେଶ୍ୱର ବଳିରାମ ବୋନ୍ଦାର, IAS ଏବଂ ମାଇ ଭାରତ, ସମ୍ବଲପୁରର ଜିଲ୍ଲା ଯୁବ ଅଧିକାରୀ ଶ୍ରୀ ପ୍ରଶାନ୍ତ କିଶୋର ମେହେର ଉପସ୍ଥିତ ରହି ଅଖିଳେନ୍ଦ୍ର ଶାସନୀଙ୍କୁ ଅଭିନନ୍ଦନ ଜଣାଇବା ସହ ଶୁଭେଚ୍ଛା ଜଣାଇଥିଲେ।

ଅଖିଳେନ୍ଦ୍ର ଶାସନୀ ‘ମାଇ ଭାରତ’ ପୋର୍ଟାଲରେ ଆୟୋଜିତ ଜାତୀୟ କୁଇଜ୍ ପ୍ରତିଯୋଗିତାରେ ଦେଶର ପ୍ରାୟ ୩ ଲକ୍ଷ ପ୍ରତିଯୋଗୀଙ୍କ ମଧ୍ୟରୁ ଚୟନିତ ହୋଇଥିଲେ। ପରବର୍ତ୍ତୀ ପର୍ଯ୍ୟାୟରେ ସେ ୧୪ରୁ ୨୨ ଜୁନ୍ ୨୦୨୬ ପର୍ଯ୍ୟନ୍ତ ଉତ୍ତରାଖଣ୍ଡର ସୁକ୍କି ଗ୍ରାମରେ ରହି ସୀମାନ୍ତ ଗ୍ରାମର ଜୀବନଶୈଳୀ, ସଂସ୍କୃତି, ଆର୍ଥିକ ବିକାଶ ଓ ଆତ୍ମନିର୍ଭରତାର ବିଭିନ୍ନ ଦିଗକୁ ନିକଟରୁ ଅନୁଭବ କରିଥିଲେ। ସେ ଭାରତର ପ୍ରଥମ ଗ୍ରାମ ଜାଡୁଙ୍ଗ ପରିଦର୍ଶନ କରିବା ସହ ସ୍ଥାନୀୟ ଗ୍ରାମବାସୀ, ITBP ଯବାନ ଏବଂ ଜନପ୍ରତିନିଧିମାନଙ୍କ ସହ ମତବିନିମୟ କରିଥିଲେ।

ସୁକ୍କି ଗ୍ରାମରେ ସେଓ ଚାଷ, ପର୍ଯ୍ୟଟନ ଏବଂ ହୋମ୍-ଷ୍ଟେ ଆଧାରିତ ଅର୍ଥନୀତି କିପରି ସ୍ଥାନୀୟ ଲୋକଙ୍କ ଜୀବନଧାରାକୁ ବଦଳାଇଛି, ତାହାକୁ ସେ ନିକଟରୁ ଅଧ୍ୟୟନ କରିଥିଲେ। ସେହିପରି ସ୍ଥାନୀୟ ପାରମ୍ପରିକ ଖାଦ୍ୟର ସ୍ୱାଦ ମଧ୍ୟ ଗ୍ରହଣ କରିଥିଲେ।

କାର୍ଯ୍ୟକ୍ରମର ଏକ ସ୍ମରଣୀୟ ଅଧ୍ୟାୟ ଥିଲା ସମୁଦ୍ର ପତ୍ତନଠାରୁ ପ୍ରାୟ ୩,୦୫୦ ମିଟର ଉଚ୍ଚତାରେ ଅବସ୍ଥିତ ଜାଡୁଙ୍ଗ ଗ୍ରାମରେ ଆନ୍ତର୍ଜାତୀୟ ଯୋଗ ଦିବସ ପାଳନ। ଏହାସହ ସୀମାର ସୁରକ୍ଷାରେ ନିୟୋଜିତ ITBP ଯବାନମାନଙ୍କ ସହ ସାକ୍ଷାତ୍ ଓ ସେମାନଙ୍କ ତ୍ୟାଗ ଏବଂ କଠିନ ଜୀବନଶୈଳୀକୁ ନିକଟରୁ ଦେଖିବା ତାଙ୍କ ମନରେ ଦେଶପ୍ରେମ ଓ ରାଷ୍ଟ୍ରସେବାର ଭାବନାକୁ ଆହୁରି ଦୃଢ଼ କରିଥିଲା।

ପ୍ରଧାନମନ୍ତ୍ରୀଙ୍କ ସହ ଭର୍ଚୁଆଲ୍ ସମ୍ବାଦ ପରେ ଅଖିଳେନ୍ଦ୍ର ଶାସନୀ କହିଥିଲେ ଯେ, ଓଡ଼ିଶାକୁ ପ୍ରତିନିଧିତ୍ୱ କରିବା ତାଙ୍କ ଜୀବନର ସବୁଠାରୁ ଗର୍ବର ଏବଂ ଅବିସ୍ମରଣୀୟ ମୁହୂର୍ତ୍ତ। ଏହି କାର୍ଯ୍ୟକ୍ରମ ତାଙ୍କୁ ସୀମାନ୍ତ ଗ୍ରାମର ବିକାଶ, ଆତ୍ମନିର୍ଭରତା ଓ ଜାତୀୟ ଏକତାର ବାର୍ତ୍ତାକୁ ନିକଟରୁ ବୁଝିବାର ସୁଯୋଗ ଦେଇଥିବା ବେଳେ ‘ବିକଶିତ ଭାରତ @୨୦୪୭’ ଗଠନରେ ଯୁବଶକ୍ତିର ସକ୍ରିୟ ଅବଦାନ ରଖିବା ପାଇଁ ତାଙ୍କୁ ପ୍ରେରଣା ଯୋଗାଇଛି।

ଏହି ଜୀବନ ପରିବର୍ତ୍ତନକାରୀ ସୁଯୋଗ ପାଇଁ ସେ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ, ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରାଳୟ, ମାଇ ଭାରତ, ITBP, ଉତ୍ତରକାଶୀ ଜିଲ୍ଲା ପ୍ରଶାସନ, ସମ୍ବଲପୁର ଜିଲ୍ଲା ପ୍ରଶାସନ ଏବଂ ରେଢ଼ାଖୋଲ ଉପଜିଲ୍ଲାପାଳଙ୍କ ପ୍ରତି ଆନ୍ତରିକ କୃତଜ୍ଞତା ଜ୍ଞାପନ କରିଥିଲେ।