ସ୍ୱାସ୍ଥ୍ୟ ଅବନତି ନେଇ ଚିନ୍ତା: ଇମ୍ରାନ ଖାନଙ୍କୁ ବେସରକାରୀ ହସ୍ପିଟାଲକୁ ସ୍ଥାନାନ୍ତର ପାଇଁ ପାକ୍ ସୁପ୍ରିମକୋର୍ଟଙ୍କ ନିର୍ଦ୍ଦେଶ

ଇସ୍ଲାମାବାଦ, ୧୯ ଅଗଷ୍ଟ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ସ୍ୱାସ୍ଥ୍ୟ ଅବସ୍ଥା ଅବନତି ହେଉଥିବା ନେଇ ଚିନ୍ତା ବଢ଼ିବା ପରେ ପାକିସ୍ତାନ ସୁପ୍ରିମକୋର୍ଟ ତାଙ୍କୁ କାରାଗାରରୁ ଏକ ବେସରକାରୀ ହସ୍ପିଟାଲକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି।

୭୩ ବର୍ଷୀୟ ଇମ୍ରାନ ଖାନ ୨୦୨୩ ମସିହାରୁ ରାୱଲପିଣ୍ଡିର ଆଦିଆଲା ଜେଲରେ ବନ୍ଦୀ ଅଛନ୍ତି। ତାଙ୍କ ପରିବାର ଓ ଆଇନଜୀବୀମାନେ ଦୀର୍ଘଦିନ ଧରି ତାଙ୍କ ସ୍ୱାସ୍ଥ୍ୟ ସମ୍ପର୍କରେ ଚିନ୍ତା ବ୍ୟକ୍ତ କରିଆସୁଥିଲେ। ବିଶେଷକରି ତାଙ୍କ ଡାହାଣ ଆଖିର ଦୃଷ୍ଟିଶକ୍ତି ଗୁରୁତର ଭାବେ କମିଯାଇଥିବା ନେଇ ଅଭିଯୋଗ ହୋଇଥିଲା।

ସୁପ୍ରିମକୋର୍ଟଙ୍କ ତିନିଜଣିଆ ବେଞ୍ଚ ନିର୍ଦ୍ଦେଶ ଦେଇଛନ୍ତି ଯେ, ଇମ୍ରାନ ଖାନଙ୍କୁ ୪୮ ଘଣ୍ଟା ମଧ୍ୟରେ ଇସ୍ଲାମାବାଦସ୍ଥିତ ଶିଫା ଇଣ୍ଟରନ୍ୟାସନାଲ ହସ୍ପିଟାଲକୁ ସ୍ଥାନାନ୍ତର କରାଯିବ। ସେଠାରେ ତାଙ୍କ ଚିକିତ୍ସା ପାଇଁ ହୃଦରୋଗ, ଚକ୍ଷୁରୋଗ ଏବଂ ସାଧାରଣ ଚିକିତ୍ସା ବିଶେଷଜ୍ଞଙ୍କୁ ନେଇ ଏକ ମେଡିକାଲ ବୋର୍ଡ ଗଠନ କରାଯିବ।

ଏହା ସହ ସୁପ୍ରିମକୋର୍ଟ ଇମ୍ରାନ ଖାନଙ୍କୁ ସପ୍ତାହକୁ ଥରେ ପରିବାର ସଦସ୍ୟଙ୍କ ସହ ଭେଟିବା ଏବଂ ତାଙ୍କ ଦୁଇ ପୁଅଙ୍କ ସହ ଫୋନରେ କଥା ହେବାର ଅନୁମତି ଦେବାକୁ ମଧ୍ୟ କାରା କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।

ଇମ୍ରାନ ଖାନଙ୍କ ଦଳ ପାକିସ୍ତାନ ତେହରିକ-ଇ-ଇନସାଫ (ପିଟିଆଇ) ସୁପ୍ରିମକୋର୍ଟଙ୍କ ଏହି ରାୟକୁ ସ୍ୱାଗତ କରିଛି। ତେବେ ପାକିସ୍ତାନ ସରକାରଙ୍କ କିଛି ମନ୍ତ୍ରୀ ଏହି ନିଷ୍ପତ୍ତିକୁ ନେଇ ଆପତ୍ତି ଉଠାଇଥିବା ବେଳେ ସରକାର ରାୟରେ ସଂଶୋଧନ ପାଇଁ ଆବେଦନ କରିପାରନ୍ତି ବୋଲି ସୂଚନା ମିଳିଛି।

ଉଲ୍ଲେଖଯୋଗ୍ୟ ଯେ, ୨୦୨୨ ମସିହାରେ ଅବିଶ୍ୱାସ ପ୍ରସ୍ତାବରେ କ୍ଷମତାଚ୍ୟୁତ ହେବା ପରେ ଇମ୍ରାନ ଖାନଙ୍କ ବିରୋଧରେ ଏକାଧିକ ଦୁର୍ନୀତି ଓ ଅନ୍ୟାନ୍ୟ ମାମଲା ରୁଜୁ ହୋଇଥିଲା। ସେ ଏହି ସମସ୍ତ ଅଭିଯୋଗକୁ ରାଜନୈତିକ ଷଡଯନ୍ତ୍ର ବୋଲି ଦାବି କରୁଛନ୍ତି।